ထက်ခေါင်လင်း/Myanmar Now - ရန်ကုန်တိုင်းဥပဒေချုပ်ဖြစ်လာမည့်သူက ဘယ်လိုလူမျိုးလဲ

ထက်ခေါင်လင်း (Myanmar Now) ရန်ကုန်တိုင်းဥပဒေချုပ်ဖြစ်လာမည့်သူက ဘယ်လိုလူမျိုးလဲ
(မိုးမခ) စက်တင်ဘာ ၂၆၊ ၂ဝ၁၈
ကန့်ကွက်သူမရှိခဲ့ပါက အောင်ရဲထွေးအမှုတွင် အဂတိလိုက်စားကြောင်း စွပ်စွဲခံရပြီးနောက် ရာထူးမှ ဖယ်ရှားခံခဲ့ရသည့် ရန်ကုန်တိုင်း ဒေသကြီး ဥပဒေချုပ် ဦးဟန်ထူး၏နေရာတွင် လာမည့်ရက်ပိုင်းအတွင်း အစားထိုးခန့်အပ်ခံရမည် ဖြစ်သည်။


ရန်ကုန်တိုင်းဥပဒေချုပ်အဖြစ်အဆိုပြုခံရသည့်ဒေါ်ခင်မျိုးကြည် ( ဓာတ်ပုံ - Khin Myo Kyi Facebook)

လစ်လပ်နေသော ရန်ကုန်တိုင်းဒေသကြီး၊ တိုင်းဥပဒေချုပ်နေရာအတွက် အဆိုပြုခံရသူမှာ အသက် ၆၁နှစ်အရွယ် ပြည်ထောင်စု ရှေ့နေချုပ်ရုံး၊ ညွန်ကြားရေးမှူးဟောင်း ဒေါ်ခင်မျိုးကြည်ဖြစ်သည်။

ဥပဒေ၀န်ထမ်းအဖြစ် ၁၉၈၄မှစတင်ပြီး ၃၄နှစ်ကြာ တာဝန်ထမ်းဆောင်ခဲ့ပြီးနောက် ပြီးခဲ့သည့်ဇွန်ကလကမှ ရာထူးမှ အငြိမ်းစားယူခဲ့သည့် ဒေါ်ခင်မျိုးကြည်အား ရန်ကုန်တိုင်းဝန်ကြီးချုပ်က တိုင်းဥပဒေချုပ်နေရာအတွက် အဆိုပြုခဲ့ခြင်းဖြစ်ကြောင်း ရန်ကုန်တိုင်းလွှတ်တော် ဥက္ကဌက ယနေ့(စက်တင်ဘာ ၂၆) လွှတ်တော်ကျင်းပ စဉ်အတွင်း ကြေညာခဲ့သည်။

နေပြည်တော်ရှေ.နေချုပ်ရုံးမှ တာဝန်ရှိသူတစ်ဦးက ဒေါ်ခင်မျိုးကြည်သည် ထူးချွန်ထက်မြက်သူတစ်ဦးဖြစ်ကြောင်း မှတ်ချက်ပြုသည်။

သူသည် ကန့်ကွက်သူမရှိခဲ့ပါက အောင်ရဲထွေးအမှုတွင် အဂတိလိုက်စားကြောင်း စွပ်စွဲခံရပြီးနောက် ရာထူးမှ ဖယ်ရှားခံခဲ့ရသည့် ရန်ကုန်တိုင်း ဒေသကြီး ဥပဒေချုပ် ဦးဟန်ထူး၏နေရာတွင် အစားထိုးခန့်အပ်ခံရမည် ဖြစ်သည်။

အစိုးရအရာရှိ ဘ၀တလျှောက် မန္တလေး၊ မုံရွာ၊ နေပြည်တော်နှင့် ကရင်ပြည်နယ်တို့တွင် တာဝန်ထမ်းဆောင်ခဲ့ သည့် သူ့အားရန်ကုန်ရှေ့ နေနှင့် ဥပဒေအသိုင်းအ၀ိုင်းတွင် သိရှိသူရှားပါးလှသည်။

လစ်လပ်နေသည့် အဆိုပါနေရာတွင် ရန်ကုန်ရှေ့နေအသိုင်းအ၀ိုင်းမှ နာမည်ကြီး ရှေ့နေတစ်ဦးကို ခန့်အပ်မည်ဟု သတင်းကြားများ ထွက်ပေါ်ခဲ့သော်လည်း နာမည်စာရင်းတင်သွင်းချိန်ရောက်မှ သူ၏အမည်ကို ကြားသိခဲ့ရကြောင်း တရားလွှတ်တော်ရှေ့နေ ဦးဇော်လင်းက ဆိုသည်။

ကိုယ့်ရှေ့နေအသိုင်းအ၀ိုင်းကတောင် ဒီနာမည်ကို အခုမှသိခဲ့ရသူတွေဖြစ်တယ်။ ကိုယ့်မိတ်ဆွေဖြစ်တဲ့ အဂတိလိုက်စားမှု တိုက်ဖျက်ရေးကော်မရှင်မှာပါတဲ့ ဥပဒေပညာရှင်ကတောင်မှ သူလည်း ဒီနာမည်ပါ လူအကြောင်း မသိဘူးတဲ့။ ဒါကတော့ အမျိုးသားဒီမိုကရေစီအဖွဲ့ချုပ် NLD က ဥပဒေပညာရှင်တွေရဲ့ စီစဉ်မှုဖြစ်လိမ့်မယ်ထင်တယ် ဟု သူကဆိုသည်။

အသစ်ခန့်အပ်မည့် ဒေါ်ခင်မျိုးကြည်၏ ကိုယ်ရေးရာဇ၀င်မှတ်တမ်းများကို စာမျက်နှာ ၅ မျက်နှာနှင့်တကွ လွှတ်တော်ကိုယ်စားလှယ်များကို ဖြန့်ဝေထားပေမယ့် သူ၏နောက်ကြောင်းရာဇ၀င်များကို တိတိပပ သိကြခြင်းမရှိကြောင်း လွှတ်တော်ကိုယ်စားလှယ်များက ပြောသည်။

အခုမှ သူ့ကိုယ်ရေးရာဇ၀င်စာရွက်ပဲရတာ။ သူ့က ဘယ်လိုလူလဲဆိုတာ ကိုယ်တိုင် ဘယ်သိနိုင်မလဲ။ အဲ့ဒီအတွက် ကိုယ်မှမသိတော့ မှတ်ချက်မပြုချင်ဘူး ဟု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှ ကိုးကိုကျွန်းမြို့နယ် တိုင်းဒေသကြီး လွှတ်တော်ကိုယ်စားလှယ် ဦးတင်ဝင်းက ဆိုသည်။

ဒေါ်ခင်မျိုးကြည်သည် မန္တလေးမြို့တွင် နေထိုင်နေသူတစ်ဦးဖြစ်ပြီး မန္တလေးတိုင်း ရှေ့နေချုပ်ရုံးခွဲ၊ စစ်ကိုင်းတိုင်းဥပဒေချုပ်ရုံး၊ နေပြည်တော်ရှိ ပြည်ထောင်စု ရှေ့နေချုပ်ရုံး၊ ကရင်ပြည်နယ်ဥပဒေရုံးများတွင် တာဝန်ထမ်းဆောင်ခဲ့သည့် အိမ်ထောင်မရှိသူ တစ်ဦးဖြစ်သည်။

 

0