ဇင်လင်း ● တရားဥပဒေစိုးမိုးရေးနှင့် ရဲတပ်ဖွဲ့ဝင်တို့၏ တာဝန်

 ဇင်လင်း ● တရားဥပဒေစိုးမိုးရေးနှင့် ရဲတပ်ဖွဲ့ဝင်တို့၏ တာဝန်
(မိုးမခ) အောက်တိုဘာ ၁၀၊ ၂၀၁၈


ယခု အောက်တိုဘာလ ၁ ရက်နေ့သည် ၅၄ နှစ်မြောက် မြန်မာနိုင်ငံ ရဲတပ်ဖွဲ့နေ့ဖြစ်သည်။  မြန်မာတစ်နိုင်ငံလုံး ဗြိတိသျှ ကိုလိုနီ နယ်ချဲ့ လက်အောက်သို့ ကျရောက်ခဲ့သည့် ၁၈၈၅ ခုနှစ်နောက်ပိုင်းမှ စတင်၍ ဗြိတိသျှ ကိုလိုနီ၏ ရဲလုပ်ငန်းစနစ် ကို ကျင့်သုံးခဲ့ကြောင်း ရဲတပ်ဖွဲ့သမိုင်းမှတ်တမ်းအရ သိရသည်။ ထိုအချိန်က ရဲတပ်ဖွဲ့ကို ဗမာရဲအဖြစ် သိခဲ့ကြသည်။ ၁၉၆၄ ခုနှစ်တွင် ပြည်သူ့ရဲတပ်ဖွဲ့အဖြစ်ပြန်လည် ဖွဲ့စည်းခဲ့ပြီး ၁၉၉၅ ခုနှစ်၊အောက်တိုဘာလ ၁ ရက် နေ့တွင် မြန်မာနိုင်ငံ ရဲတပ်ဖွဲ့အဖြစ် ပြင်ဆင်ဖွဲ့စည်းခဲ့သည်။  မြန်မာနိုင်ငံရဲတပ်ဖွဲ့၏ မူဝါဒနှင့် ရည်မှန်းချက် တာဝန်များမှာ ၁။ မျိုးချစ် စိတ်ရှိရ မည်။ ၂။ စွမ်းရည်ပြည့်ဝရမည်။ ၃။ ခေတ်မီရမည်။…ဟု ချမှတ်ထားကြောင်း တွေ့ရသည်။

မြန်မာနိုင်ငံရဲတပ်ဖွဲ့၏ ရည်မှန်းချက်တာဝန်များမှာ (က) ပြည်တွင်းလုံခြုံရေးနှင့် ရပ်ရွာအေးချမ်းသာယာရေး။ (ခ) တရားဥပဒေစိုးမိုးရေး။ (ဂ) မူးယစ်ဆေးဝါးအန္တရာယ်တားဆီးကာကွယ်ရေး။ (ဃ) ပြည်သူ့အကျိုးပြုလုပ်ငန်းများ ဆောင် ရွက်ရေး။ဟူ၍ ၄ ချက်ချမှတ်ထားသည်ကို တွေ့ရသည်။ ထို့ပြင် ရဲတပ်ဖွဲ့ဝင်များအတွက် အခြေခံအရည်အချင်း ၅ ရပ် (စံ ငါး ရပ်) သတ်မှတ်ထားသည်ကိုလည်း တွေ့ရသည်။ ၁။ စိတ်ဓာတ်ကောင်းမွန်မှု။ ၂။ စည်းကမ်းကောင်းမွန်မှု။ ၃။ သစ္စာ စောင့်သိမှု။ ၄။ စည်းလုံးညီညွတ်မှု။ ၅။ စွမ်းရည်ပြည့်ဝမှု။ စသည်ဖြင့် ဖြစ်သည်။

ယေဘုယျအားဖြင့် ရဲတပ်ဖွဲ့က ချမှတ်ထားသော အခြေခံအရည်အချင်း စံ ၅ ရပ်ကို တပ်ဖွဲ့ဝင်များ စနစ်တကျသာ လိုက်နာ မည်ဆိုပါက ရဲတပ်ဖွဲ့၏ ဂုဏ်သတင်း တိုးတက်ကောင်းမွန်လာမည်မှာ သေချာသည်။ သို့သော် ယနေ့လက်တွေ့မြေပြင်၌ ရဲတပ်ဖွဲ့အပေါ် ပြည်သူလူထု၏ ယုံကြည်ကိုးစားမှု လျော့နည်းနေသည်မှာ အရှိတရားဖြစ်သည်။ ပြည်သူတို့၏ အခွန် ဘဏ္ဍာ လစာရိက္ခာငွေကို စားသုံးနေသော ရဲတပ်ဖွဲ့ဝင်တို့အနေဖြင့် ပြည်သူနှင့် ဆက်ဆံရာတွင် အနည်းဆုံး ယဉ်ကျေးဖို့ တော့ လိုပေမည်။ စာဖြင့် ကူညီပါရစေဟု ဆိုထားသော်လည်း လက်တွေ့ဆက်ဆံရာတွင် ခွဲခြားဆက်ဆံမှုများ ရှိနေသည် ဟု ပြည်သူတို့က ဝေဖန်ပြောဆိုမှုများရှိနေသည်။ ယင်းအခြေအနေကို ပြုပြင်ပြောင်းလဲရန်မှာ ရဲတပ်ဖွဲ့ဝင်များအားလုံး၌ တာဝန်ရှိပေသည်။ ဒီမိုကရေစီ ပြုပြင်ပြောင်းလဲရေးခေတ်တွင် လူအချင်းချင်း အပြန်အလှန်လေးစားမှုဖြင့် ဆက်ဆံရမည် ဆိုသည်ကို ရဲတပ်ဖွဲ့ဝင်တိုင်းလက်ခံသင့်သည်။ ပြည်သူ့ဆန်ကို စားနေသူများက ပြည်သူကို ပို၍ လေးစားရမည်ဖြစ်သည်။

ယခု ၂၀၁၈ ခုနှစ် အောက်တိုဘာလ ၁ ရက်၊ (၅၄) နှစ်မြောက် မြန်မာနိုင်ငံ ရဲတပ်ဖွဲ့နေ့တွင်  ဒုတိယရဲဗိုလ်ချုပ်ကြီး အောင်ဝင်းဦးက တရားဥပဒေစိုးမိုးရေး ဆောင်ရွက်ရာတွင် ဒီမိုကရေစီနည်းလမ်းတကျ လက်ခံကျင်းသုံးနေသည့် ဥပဒေများ အာဏာသက်ရောက်မှုရှိစေရန် ‘ဒီမိုကရေစီရဲလုပ်ငန်း’ ကို အကောင်အထည်ဖော်ဆောင်ရွက်ရမည်ဖြစ်သည်ဟု  ပြောကြားခဲ့ကြောင်း ၇ ရက်နေ့စဉ်သတင်းအရ သိရသည်။

‘‘ဒီမိုကရေစီလုပ်ငန်းရဲ့ အနှစ်သာရဟာ ပြည်သူလူထု ပူးပေါင်းပါဝင်တဲ့ ရဲလုပ်ငန်းစနစ် ဖြစ်သည်။ ဒီလိုဆောင်ရွက်ရာမှာ အောင်မြင်စေဖို့အတွက် အမှန်တကယ်ပြည်သူလူထု ပူးပေါင်းပါဝင်လာအောင်ဆောင်ရွက်နိုင်ဖို့လည်း အရေးကြီးပါတယ်။’’ ဟု ရဲချုပ်က ဆိုသည်။ ပြည်သူလူထု၏ ပူးပေါင်းဆောင်ရွက်မှုကို အမှန်တကယ် ရယူလိုပါက၊ ပြည်သူက ကြောက်ရွံ့သော ရဲအဖွဲ့မဟုတ်ဘဲ ပြည်သူကို ဂရုတစိုက် အကူအညီပေးနေသော ရဲတပ်ဖွဲ့ဖြစ်ကြောင်း တပ်ဖွဲ့ဝင်တိုင်းက လက်တွေ့ပြသ ကြရန်လိုသည်။ ထိုသို့ဖြစ်လာစေရန် ထိုက်ထိုက်တန်တန် ဆုပေးဒဏ်ပေးစနစ် ကျင့်သုံးရန်လည်း လိုသည်။

ရဲလုပ်ငန်းစနစ် အကောင်အထည်ဖော်ရာတွင်  ပြည်သူများအတွက် ၀န်ဆောင်မှု ပေးနေသည်ဆိုသောအသိဖြင့် အလေး ထားဆက်ဆံ၍ ကူညီ ဆောင်ရွက်ရန် မြန်မာနိုင်ငံ ရဲတပ်ဖွဲ့ရဲချုပ် က (၅၄) နှစ်မြောက်  မြန်မာနိုင်ငံရဲတပ်ဖွဲ့နေ့အခမ်းအ နား၌ ပြောသည်။ ထိုသို့ တာဝန်ဆောင်ရွက်ပါက  ရဲတပ်ဖွဲ့အပေါ်ပြည်သူများ အမြင်ကြည်လင်၍ စစ်မှန် ကောင်းမွန်သော တုံ့ပြန်မှုများရရှိ နိုင်မည်ဆိုသည်ကိုလည်း ရဲတပ် ဖွဲ့ဝင်များ သိရှိထားဖို့လိုသည်ဟု ဟု ရဲချုပ်ကဆိုသည်။ နေပြည်တော်ရှိ သင်္ဂဟဟိုတယ်၌ အောက်တိုဘာ ၁ ရက်ကပြုလုပ်သော(၅၄)နှစ်မြောက်  မြန်မာနိုင်ငံရဲတပ်ဖွဲ့နေ့အခမ်းအနား၌ ပြောကြား သည့် မိန့်ခွန်းတွင်  ရဲချုပ်က ထည့်သွင်းပြောကြားခြင်းဖြစ်သည်။ ထို့ပြင် ကြိုတင်ကာကွယ်ရေး၊ မှုခင်းကျဆင်းရေး လုပ်ငန်း စဉ်များအတွက် ပြည်သူလူထုပူး ပေါင်းပါဝင်မှသာ အောင်မြင်မှုရရှိမည်ဖြစ်၍ ပြည်သူလူထု ပူးပေါင်းပါဝင်သော ရဲလုပ်ငန်း စနစ်ကို ကမ္ဘာ့နိုင်ငံများ၌ ပိုမိုကျင့်သုံးလာသည်ဟုလည်း ရဲချုပ်ကဆိုသည်။ မှုခင်းများကို ဖြစ်လာသည့် အချိန်မှတုံ့ပြန်ခြင်း ထက် မဖြစ် မီကြိုတင်ကာကွယ်မှုလုပ်ငန်းများဆောင်ရွက်ရခြင်းသည် အလွန်အရေးကြီးသည်ဟု ရဲချုပ်က ဆိုသည်။ ရဲချုပ်အနေဖြင့် ယခုကဲ့သို့ တိုက်တွန်းနှိုးဆော်သည်မှာ ကောင်းပါသည်။ တနှစ်တခါ အခမ်းအနား၌ နှိုးဆော်ရုံဖြင့် မလုံ လောက်ဘဲ၊ နေ့စဉ် လုပ်ငန်းတာဝန်များ ဆောင်ရွက်မှုများအပေါ် ဆင့်ကဲ တာဝန်ယူမှု တာဝန်ခံမှုဖြင့် ကြီးကြပ်ကွပ်ကဲ ကြမှသာ ရဲတပ်ဖွဲ့အပေါ် ပြည်သူက အမြင် ကြည်လင်လာနိုင်မည် ဖြစ်သည်။

အလားတူ (၅၄)နှစ်မြောက် မြန် မာနိုင်ငံရဲတပ်ဖွဲ့နေ့ အခမ်းအနား ဂုဏ်ပြုအမှာစကားပြောကြားရာတွင်  မူးယစ်ဆေးဝါး ကိစ္စရပ်များ ကိုင်တွယ်ဖြေရှင်းရာ၌ လူမှုပတ်ဝန်းကျင်စီးပွားရေးဆိုင်ရာ ပြဿနာများနှင့် ဆက် နွှယ်နေသဖြင့် လက်ရှိ ဥပဒေနှင့် တရားစီရင်ရေးတစ်ခုတည်းအပေါ် မှီခိုအားထားနေရုံဖြင့် မလုံလောက်တော့ဟု ဒုတိယသမ္မတ ဦးမြင့်ဆွေက ပြောသည်။ ရဲတပ်ဖွဲ့အပါအဝင် တရား စီရင်ရေးကဏ္ဍနှင့်အတူ ပညာရေး၊ ကျန်းမာရေး၊ အိုးအိမ်နေရာချထားရေး၊ အလုပ်အကိုင်ရှာဖွေ ရေးကဏ္ဍများအပါအဝင် မီဒီယာများ၊ အစိုးရမဟုတ်သော ပြည်တွင်း၊ ပြည်ပအဖွဲ့အစည်းအသီးသီးက ကဏ္ဍပေါင်းစုံမှ ပူးပေါင်း ဆောင်ရွက်ရန် အထူးအရေးကြီးကြောင်း ဒုသမ္မတက တိုက်တွန်း ပြောကြားသည်။

မြန်မာနိုင်ငံသည် မူးယစ် ဆေးဝါးပြဿနာကို ကိုင်တွယ် ဖြေရှင်းနိုင်ရေး ဘက်ပေါင်းစုံချဉ်း ကပ်မှုများပါဝင်သော အမျိုးသား မူးယစ်ဆေးဝါးထိန်းချုပ်ရေးမူဝါဒ သစ်တစ်ရပ်ကို ၂၀၁၇ နိုဝင်ဘာ ၂၃ ရက်က ရေးဆွဲပြဋ္ဌာန်းကာ အကောင်အထည်ဖော် ဆောင်ရွက်နေကြောင်း ဒုသမ္မတက ဆိုသည်။ မူးယစ်ဆေးဝါးထိန်းချုပ်ရေး မူဝါဒသစ်အရ ဘိန်းစိုက်ပျိုးထုတ် လုပ်မှု လျှော့ချ ရေး၊ အစားထိုးဖွံ့ဖြိုးရေး၊ မူးယစ်ဆေးဝါးသုံးစွဲမှုနှင့် နောက်ဆက်တွဲ အန္တရာယ်များလျှော့ချရေး၊ နိုင်ငံတကာနှင့် ပူး ပေါင်း ဆောင်ရွက်ရေး၊ သုတေသနလုပ်ငန်းများတိုးမြှင့်ရေး၊ လူ့အ ခွင့်အရေးပြဋ္ဌာန်းချက်များနှင့် အညီ ဖြစ်စေရေးများ အပါအဝင် လူမှုဘဝဖွံ့ဖြိုးတိုးတက်ရေးကိစ္စရပ်များ အလေးထားဆောင်ရွက်ရန် စသည့်အချက်များပါဝင်သည် ဟု ဒု-သမ္မတက ထည့်သွင်းပြောကြားခဲ့ကြောင်း သတင်းအရ သိရသည်။

ယနေ့ မြန်မာနိုင်ငံတွင် ပေါ်ပေါက်နေသည့် “မူးယစ်ဆေးဝါးပြဿနာ” သည် နိုင်ငံရေး။ စီးပွားရေး၊ လူမှုရေး၊ ပညာရေး၊ ကျန်းမာရေး အစရှိသော ကဏ္ဍအားလုံးကို ဆုတ်ယုတ်ပျက်စီးစေသည့် ပဓါန အကြောင်းဖြစ်နေသည်ကို အစိုးရ အဆက်ဆက် သိလျှက်နှင့် မျက်ကွယ်ပြုခဲ့ကြသည်။ နိုင်ငံရေးရှုထောင့်က ကြည့်လျှင် မူးယစ်ဆေးဝါးနှင့် ဘိန်းစိုက်ပျိုး ထုတ်လုပ်မှုက ရရှိနေသော ကြီးမားလွန်းသည့် အကျိုးစီးပွားများကြောင့် ပြည်တွင်းစစ် အဆုံးမသတ်နိုင်ဖြစ်နေသည်။ ငြိမ်းချမ်းရေးဆွေးနွေးပွဲများတွင် သဘောတူညီမှု ရရှိရန် ခက်ခဲကြံ့ကြာနေသည်။ အမျိုးသားပြန်လည် သင့်မြတ်ရေးနှင့် လည်း  အလှမ်းဝေးနေရသည်။ မူးယစ်ဆေးပြဿနာကို အာဏာရ အစိုးရ တစ်ရပ်က အမှန်တကယ် ရိုးရိုးသားသား တိုင်းချစ်စိတ်ပြည်ချစ်စိတ်ဖြင့် ပိုင်းဖြတ်ဆောင်ရွက်မှသာ အဖြေကောင်းတစ်ခု ထွက်နိုင်မည် ဖြစ်သည်။

စီးပွားရေးနှင့် လူမှုရေးရှုထောင့်က ကြည့်လျှင် မူးယစ်ဆေးနှင့် ဘိန်းမှောင်ခိုရာဇာများ၏ ငွေမည်းခ၀ါချမှု (Money Laundering) များကြောင့် အဆမတန် ငွေကြေး ဖေါင်းပွမှု (Hyper-Inflation) ဖြစ်ပေါ်နေရသည့် အချက်ကိုလည်း သတိမူသင့်သည်။ ကိုယ်ကျင့်သီလပျက်ပြာသော ၀ိသမလောဘ စီးပွားရေးသမားများ၏ မူးယစ်ငွေမည်းများကြောင့် ရွှေဈေး၊ ဒေါ်လာဈေး၊ အိမ်ခြံမြေ တိုက်တာဈေးနှင့် အခြေခံစားကုန်ဈေးများ အဆမတန် တက်နေရသည်။ နိုင်ငံ၏ လူမှုစီးပွားရေးဘ၀ တည်ငြိမ်မှု ပျက်ပြား ခဲ့ရသည်။ အကျိုးဆက်မှာ ဆင်းရဲသား လက်လုပ်လက်စားများ အလုပ်လက်မဲ့ အိုးမဲ့အိမ်မဲ့ ဘ၀ရောက်ကြရသည်။ အခြားတဖက်၌ လူငယ်လူရွယ်များ မူးယစ်ဆေးစွဲမှုကြောင့် သက်ဆိုင်ရာ မိသားစုများ ဒုက္ခရောက်ကြရသည်။ အထူးသဖြင့် တိုင်းရင်းသား ဒေသများတွင် ဆေးစွဲသည့် ပြဿနာကြောင့် သိသိသာသာ လူမှုဒုက္ခ များ ကြုံကြရသည်။ ရာဇ၀တ်မှုများလည်း တိုးများလာသည်။ ဒေသအလိုက် ကျောင်းသားလူငယ်များ၏ ကျန်းမာရေး ပညာရေးအပေါ်လည်း ဆိုးရွားသော အကျိုးသက်ရောက်မှုများ ကျရောက်ရသည်။

သို့သော်လည်း လတ်တလော သတင်းကောင်းမှာ မူးယစ် ဆေးဝါး တားဆီး ကာကွယ် တိုက်ဖျက်ရေးအတွက် ပြည်သူများ ထံမှ သတင်းအချက်အလက်များ ရရှိနိုင်ရန် အထူးသတင်း တိုင်ကြားရေးဌာနကို ၂၂-၆-၂၀၁၈ ရက်နေ့က နိုင်ငံတော် သမ္မတရုံး၏ စာ အမှတ် (၁၈၇/၂၀၁၈) ဖြင့် ဖွဲ့စည်းပေးလိုက်ခြင်း ဖြစ်သည်။ ဇွန်လ ၂၆ ရက်က နေပြည်တော်ရှိ အပြည် ပြည် ဆိုင်ရာ ကွန်ဗင်းရှင်းဗဟိုဌာန၌ ကျင်းပသော အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနှင့် တရားမ၀င် ရောင်း ၀ယ်မှု တိုက်ဖျက်ရေးနေ့ အခမ်းအနားမိန့်ခွန်းတွင် နိုင်ငံတော်သမ္မတက မူးယစ်ဆေးဝါး ထိရောက်စွာ နှိမ်နင်းနိုင်ရေး အတွက် နိုင်ငံတော်သမ္မတရုံးတွင် ‘မူးယစ်ဆေးဝါး အထူး သတင်းပေး တိုင်ကြားရေးဌာန’ ဖွဲ့စည်းထားပြီး သတင်းပေး တိုင်ကြား သူများအား ထိုက်တန်သည့်ဆုကြေးနှင့် အခွန်ကင်းလွတ်ခွင့်ပေးမည်ဟု ထည့်သွင်းပြောကြားခဲ့သည်။

၂၀၁၈ မေလ ၃၁ ရက်နေ့က နိုင်ငံတော်သမ္မတနေအိမ်မှာ မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများ အန္တရာယ် တားဆီးကာကွယ်ရေးအဖွဲ့မှ တာဝန်ရှိသူများအား တွေ့ဆုံစဉ် နိုင်ငံတော်သမ္မတ ဦးဝင်းမြင့်က လူငယ်များ  မူးယစ်ဆေးဝါးသုံးစွဲမူ ပိုမိုများပြားလာသောကြောင့်  မူးယစ်ဆေးဝါးတိုက်ဖျက်ရေးကို အမျိုးသားရေးတာဝန်တစ်ခုအဖြစ် တိုက်ဖျက်ကြရန် ညွှန်ကြားလိုက်သည်ဟု လူမူဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒု-၀န်ကြီး ဦးစိုးအောင် က ပြောခဲ့သည်။ မူးယစ်ဆေးဝါးတားဆီးနှိမ်နှင်းရေး အထူးအဖွဲ့ကို သီးခြားဖွဲ့စည်းပြီး ဗဟိုမှ တိုက်ရိုက်ကွပ်ကဲသွားရန်နှင့် မူးယစ်ဆေးဝါးစိုက်ပျိုး၊ ထုတ်လုပ်ရောင်းချ ဖြန့်ဖြူးသည့် သူများကို ထိထိရောက်ရောက် ပြစ်ဒဏ်ချမှတ်ရမည်ဖြစ်ကြောင်း  နိုင်ငံတော်သမ္မတ က ညွှန်ကြားသည်ခဲ့သည်။ မူးယစ်ဆေးဝါး တားဆီးနှိမ်နှင်းရေး အဖွဲ့များကို မြို့နယ်၊ ခရိုင်နှင့် တိုင်း ဒေသကြီးများ၊ ပြည်နယ်များတွင် ဒေသဆိုင်ရာ တာဝန်ရှိသူများနှင့်  အရပ်ဖက်အဖွဲ့ များ၊ စိတ်ပါဝင်စားသည့် ပြည်သူများကိုလည်း ထည့်သွင်းဖွဲ့စည်း၍ ယင်းအဖွဲ့များအား ထိုက်ထိုက်တန်တန် ဆုငွေချီးမြှင့် အားပေးရန်လည်း သမ္မတက ညွှန်ကြားခဲ့သည်။ မြန်မာနိုင်ငံ၏ ပြည်တွင်းစစ် သက်ဆိုးရှည်နေခြင်းသည်ပင်လျှင် မူးယစ် ဆေးဝါးထုတ်လုပ်ရောင်းဝယ်ဖေါက်ကားမှုနှင့် တိုက်ရိုက် ဆက်စပ် နေသည်။ နိုင်ငံ့အညွန့်အဖူး ကျောင်းသားလူငယ်များ ဘ၀ပျက်ကြရခြင်းကိစ္စသည်လည်း မူးယစ်ဆေးကြောင့်ပင်ဖြစ်သည်။ ထို့ပြင် နိုင်ငံကို ဆင်းရဲမွဲတေစေသော အစိုးရ အမှုထမ်း အရာထမ်းများ အဂတိလိုက်စားခြင်းနှင့်လည်း မူးယစ်ဆေးဝါး ပြဿနာက ဆက်နွယ်နေသည်။ ထို့ကြောင့် သမ္မတ၏ မူးယစ်ဆေးဝါး တားဆီးနှိမ်နှင်းရေးအစီအစဉ်သည် နိုင်ငံ့ရှေ့ရေးအတွက် အလွန်အရေးပါသည်။

ထို့ကြောင့် မြန်မာနိုင်ငံရဲတပ်ဖွဲ့အနေဖြင့် နိုင်ငံတော် သမ္မတ၏ မူးယစ်ဆေးဝါးတိုက်ဖျက်ရေးအစီအစဉ်ကို အမျိုးသား ရေးတာဝန်အဖြစ် ယခု (၅၄)နှစ်မြောက် မြန်မာနိုင်ငံရဲတပ်ဖွဲ့နေ့မှ အစပြု၍ တက်တက်ကြွကြွ ပူးပေါင်းကူညီ ဆောင်ရွက် ကြရန် သန္နိဋ္ဌာန်ချသင့်ပေသည်။ NLD အစိုးရ၏ မူးယစ်ဆေးဝါးဆိုင်ရာမူဝါသစ်သည် မူးယစ်ဆေးပြဿနာကို ကျန်းမာရေး-လူ့အခွင့်အရေး ရှုထောင့်များမှ ချဉ်းကပ်ဖြေရှင်းရေး အခြေခံဖြင့် ရေးဆွဲခဲ့ခြင်းဖြစ်သည်။ ဥပဒေ စိုးမိုးရေးကို ထိရောက် အောင် မဖေါ်ဆောင်နိုင်ပါက၊ မူးယစ်ဆေးဝါးတိုက်ဖျက်ရေး အောင်မြင်ရန် မလွယ်လှပါ။ ထို့ကြောင့် မြန်မာနိုင်ငံ ရဲတပ်ဖွဲ့ အနေဖြင့် ဥပဒေစိုးမိုးရေးတည်တန့်ခိုင်မြဲစေရန် တာဝန်ယူဖို့ လိုပါသည်။

မြန်မာနိုင်ငံရဲတပ်ဖွဲ့၏ ရည်မှန်းချက်တာဝန်များတွင် ပြည်တွင်းလုံခြုံရေးနှင့် ရပ်ရွာအေးချမ်းသာယာရေး၊ တရားဥပဒေစိုးမိုး ရေး၊ မူးယစ်ဆေးဝါးအန္တရာယ်တားဆီးကာကွယ်ရေး နှင့် ပြည်သူ့အကျိုးပြုလုပ်ငန်းများ ဆောင်ရွက်ရေး စသည်တို့ပါဝင် သဖြင့်  ၎င်းရည်မှန်းချက်များအတိုင်း ဆောင်ရွက်လျှင် လုံလောက်ပါသည်။ ထို့ပြင် ရဲတပ်ဖွဲ့ဝင်များအတွက် အခြေခံ အရည်အချင်း ၅ ရပ် ဖြစ်သော စိတ်ဓာတ်ကောင်းမွန်မှု၊ စည်းကမ်းကောင်းမွန်မှု၊ သစ္စာ စောင့်သိမှု၊ စည်းလုံး ညီညွတ်မှု နှင့် စွမ်းရည်ပြည့်ဝမှု စသည်တို့ကို လည်း ကိုယ်ကျင့်သီလသဖွယ် စောင့်ထိန်းနိုင်ရန် ကြိုးပမ်းဖြည့်ဆည်းနိုင်ပါက၊ ပြည်သူတို့ ၏ လေးစား ချစ်ခင်မှုကို ပြန်လည် ရယူနိုင်မည် ဖြစ်သည်ဟု သုံးသပ်မိပါသည်။

အောက်တိုဘာလ ၈ ရက်၊ ၂၀၁၈၊ တနင်္လာနေ့ထုတ် "ဒီလှိုင်းဂျာနယ်" တွင် ဖေါ်ပြခဲ့သည့် ဆောင်းပါး
0