စိုးနောင် (မုံရွာ) ● ရန်ကုန်ရောက်စ

 စိုးနောင် (မုံရွာ) ● ရန်ကုန်ရောက်စ
(မိုးမခ) ဒီဇင်ဘာ ၁၇၊ ၂၀၁၈

ထမင်းချိုင့်လေးထဲ
စောင့်စားခြင်းတွေထည့်လို့။

ရန်ကုန်သူတွေ လည်ပင်းလှတာ
လိုင်းကားစောင့်ရလွန်းလို့ဖြစ်မယ်။

လိုင်းကားစောင့်ရင်း
ငါ့ခြေထောက်က သစ်မြစ်တွေထွက်လာပေါ့။

ကားတွေက
လူလိုလမ်းလျှောက်နေပြီး
လူ့စိတ်တွေက
ကားလိုပြေးနေကြတယ်။

သံဃာတွေ့တိုင်း
ဆွမ်းမကပ်နိုင်ပေမယ့်
ထိုင်ခုံကပ်နိုင်ပါတယ်။

လူကြီးသူမတွေ့တိုင်း
ငွေကြေးမကန်တော့နိုင်ပေမယ့်
ထိုင်င်ခုံကန်တော့နိုင်ပါတယ်။

ကောင်မလေးတွေက
ရင်နဲ့တိုက်လိုက်
တင်နဲ့တိုက်လိုက်
ငါ့မှာ
ရှိန်းရှိန်း ဖိန်းဖိန်း။      ။

စိုးနောင် (မုံရွာ)

illustration by Nofar Grad