Bomb blast in Rangoon, Insein -


အင်းစိန် အောင်ဇေယျတံတား အနီးဗုံးကွဲ၊ လက်သည် အဖွဲ့အစည်းအမည် မဖော်နိုင်သေး
ခင်နှင်းလွင် ၊ ရန်ကုန်
ဖေဖေါ်ဝါရီ ၂၈၊ ၂၀၁၁
ယမန်နေ့ည ၇ နာရီဝန်းကျင်က အင်းစိန် လှိုင်မြစ်ကမ်းအနီး အောင်ဇေယျတံတားအနီး ဗုံးပေါက်ကွဲခဲ့ရာ ဗုံးသယ်လာသူတွင် ဒဏ်ရာပြင်းထန်စွာရခဲ့ပြီး မည်သည့်အဖွဲ့အစည်းမှ ဖြစ်သည်ကို တထစ်ချပြောဆိုနိုင်ခြင်း မရှိဟု သွားရောက်စုံစမ်းခဲ့သည့် ပြည်တွင်း သတင်းထောက် တဦးကပြောသည်။
ဗုံးဖောက်ခွဲရန် ကြံစည်သူဟု ယူဆရသည့် အမျိုးသား၏ လွယ်အိတ်ထဲတွင် ပေါက်ကွဲခဲ့ခြင်းဖြစ်သည်ဟု သိရပြီး ထိုအမျိုးသားမှာ ပေါက်ကွဲမှုကြောင့် ခြေထောက်ပြတ်သွားခဲ့ကာ သွေးရူး သွေးတန်းဖြစ်နေခဲ့ပြီး ရဲများက စစ်မေးပြီး အင်းစိန်ဆေးရုံသို့ ရှေးဦးစွာပို့ခဲ့သည်ဟု အဆိုပါ သတင်းထောက်ကပြောသည်။ ပေါက်ကွဲမှုကြောင့် ဗုံးသယ်ဆောင်လာသူ အပါအ၀င် အနည်းဆုံး ၅ ဦး ဒဏ်ရာရခဲ့သည်ဟုလည်း အဆိုပါ သတင်းထောက်က ဆိုသည်။
ထိုသို့ အင်းစိန်ဆေးရုံပို့ပြီးနောက်မကြာမီတွင် တရားခံဟု ယူဆရသူအား အင်းစိန်ဆေးရုံမှ ထပ်မံရွှေ့ပြောင်းခဲ့သည်ဟုလည်း သိရှိရသည်။
ရန်ကုန်မြို့တွင် ဖြစ်ပွားခဲ့သည့် ပေါက်ကွဲမှုအများစုမှာ မည်သည့်အဖွဲ့အစည်းဖြစ်သည်ကို အထောက်အထားခိုင်ခိုင်မာမာဖြင့် ဖေါ်ထုတ်မှု နည်းပါးလွန်းပြီး များသောအားဖြင့် ထိုင်းမြန်မာနယ်စပ် အခြေစိုက် အဖွဲ့အစည်းများဖြစ်သည့် အေဘီအက်စ်ဒီအက်ဖ်၊ ကေအန်ယူနှင့် စွမ်းအားမြှင့်ကျောင်းသားစစ်သည်တော် အဖွဲ့တို့ကို စစ်အစိုးရက စွပ်စွဲလေ့ရှိသည်ကို တွေ့ရသည်။
၂၀၀၅ ခုနှစ် ပုဇွန်တောင် ကုန်သွယ်မှု ဗဟိုစင်တာနှင့် စီးတီးမတ် ၂ နေရာတို့တွင် တပြိုင်နက်ထဲ ဗုံးကွဲမှုမှ အစပြုပြီး ၂၀၀၈ ရန်ကုန်ထရိတ်ဒါး ဟိုတယ်အနောက်ဘက် ဗုံးကွဲမှုနှင့် ၂၀၀၉  စက်တင်ဘာ စက်မှုဇုန် ဗုံးကွဲခဲ့မှု၊ မတ်လတွင်း ကားဂိတ်များဗုံးကွဲမှု၊ ယမန်နှစ် သင်္ကြန် အိတ်စ်တူးအို မဏ္ဍပ်ဗုံးကွဲမှု များအထိ သက်သေခိုင်ခိုင်မာမာဖြင့် ဖေါ်ထုတ်ခဲ့ခြင်းမရှိပဲ နိုင်ငံရေးအရ ဖမ်းဆီးသည့် တရားခံအချို့နှင့် မသက်ဆိုင်သူအချို့ကို တရားခံအဖြစ် စွပ်စွဲပြစ်ဒဏ်ပေးခဲ့သည် ကိုသာတွေ့ခဲ့ရသည်။
ဗိုလ်ချုပ်ခင်ညွန့် ဦးဆောင်သည့် စစ်ထောက်လှမ်းရေး အားဖြုတ်ချပြီးနောက် အသစ်ပြန်လည်ဖွဲ့စည်းသည့် စစ်ဖက်ရေးရာ လုံခြုံရေးအဖွဲ့ (စရဖ) နှင့် ရဲနှင့် သတင်းတပ်ဖွဲ့ (အက်စ်ဘီ) တို့မှာသီးခြားစီသတင်းယူလှုပ်ရှား လျက်ရှိပြီး တခါတရံ တဖက်အဖွဲ့မှ မွေးထားသည့် သတင်းပေးများအား အခြားတဖက်မှ မှားယွင်းဖမ်းဆီးခဲ့သည့် ဖြစ်ရပ်များလည်း ရှိသည်ဟု ရန်ကုန်မြို့ ကျောက်တံတားမြို့နယ်မှ ရဲတပ်ဖွဲ့ဝင်တဦး၏ ပြောဆိုချက်အရသိရသည်။
အဆိုပါရဲ တပ်ဖွဲ့ဝင်၏ ပြောဆိုချက်အရ ဆိုပါက လှိုင်သာယာ နှင့် အခြားစက်မှုဇုန်တို့တွင် ပေါက်ကွဲခဲ့သည့် ရှေ့ဆင့်နောက်ဆင့် ဗုံးကွဲမှုများတွင် ရဲအဖွဲ့ဝင်များက မသင်္ကာသူအချို့ကိုဖမ်းဆီးခဲ့ရာတွင် စရဖ သတင်းပေးများ ပါဝင်ခဲ့သည့် အတွက် ထိုစဉ်က ရန်ကုန်တိုင်း ရဲမှူးကြီး ၀င်းနိုင်မှာ အပြစ်တင်ခံခဲ့ရသည်ဟုလည်းအဆိုပါ ရဲတပ်ဖွဲ့ဝင်ကပြောသည်။
မြန်မာနိုင်ငံတွင် ပေါက်ကွဲမှုများ ဖြစ်ပွားလျင် နယ်စပ်အခြေစိုက် လက်နက်ကိုင်အဖွဲ့နှင့် အတိုက်အခံအဖွဲ့များကိုသာ စွပ်စွဲလေ့ရှိသည့်အတွက် လူထုအနေဖြင့် စစ်အစိုးရထုတ်ပြန်သည့် ကြေညာချက်များအား ယုံကြည်လေ့မရှိသည်ကိုလည်း တွေ့ရသည်။
မြန်မာပြည်တွင်းနှင့် ရန်ကုန်မြို့တွင်း ဗုံးပေါက်ကွဲ ဖြစ်စဉ်များကို မဇ္ဈိမသတင်း မှတ်တမ်းတွင် ကြည့်ရှု လေ့လာနိုင်သည်။ http://www.mizzima.com/political-background/military-vs-opposition/bomb-attacks.html

Comments