မောင်ရစ် - ဖေ့စ်ဘွတ်ပရိသတ်ကြီး အဆင့်မြင့်ကြဖို့အရေး



မောင်ရစ် - ဖေ့စ်ဘွတ်ပရိသတ်ကြီး အဆင့်မြင့်ကြဖို့အရေး
(အတွေးအမြင်မဂ္ဂဇင်း၊ ဇူလိုင်၊ ၂၀၁၈) မိုးမခ၊ ဇူလိုင် ၂၀၁၈

မတ် ၂၁ မှာ အင်တာနက်သတင်းတွေအရ Cambridge Analytica နည်းပညာဆက်ဆံရေးကုမ္မဏီဟာ ၂၀၁၆ ဇွန်လကတည်းက ဖေ့စ်ဘွတ် ပရိသတ်ရဲ့ သန်း ၅၀ရဲ့ ဒေတာတွေကို စုဆောင်းခဲ့တယ်၊ အဲသည်ဒေတာမိုဒယ်နဲ့ ထရန့်သမ္မတကင်ပိန်းအတွက် အသုံးချခဲ့တယ်လို့ ဆိုလိုက်ပါတယ်။ အဲသည်အတွက် အမေရိကန်နိုင်ငံရေးသမားတွေနဲ့ ပရိသတ်ကြီးအားလုံး စိတ်ဆိုးကြတယ်၊ မခံမရပ်နိုင်ဖြစ်ကြတယ်လို့ ဆိုပါတယ်။

ဖေ့စ်ဘွတ်ကို ဖျက်သိမ်းပစ်ရမယ်လို့ တောင်းဆိုသူတွေ တောင်းဆိုနေကြတာကြောင့် အဲသည်အုံကြွမှုကို တုန့်ပြန်တဲ့အနေနဲ့ ဖေ့စ်ဘွတ်ထူထောင်သူ ဇူကဘတ်က မီဒီယာရှေ့ကိုထွက်ပြီး ရှင်းလင်းရာမှာ ‘အတိတ်ကို အတိတ်မှာပဲ ထားခဲ့ဖို့’ နဲ့ ရှေ့လျောက်သင်ခန်းစာယူပြီး ပြုပြင်သွားမယ်’ လို့ ပြောလိုက်ပါတယ်။ အဲသည် ဖေ့စ်ဘွတ်ရဲ့ ပရိသတ်ပရိုဖိုင်းတွေကို ကြော်ငြာရှင်တွေ ကင်ပိန်းသမားတွေ ငွေကြေးပေးဝယ်ယူသူတွေထံ ရောင်းချ စီးပွားရှာခြင်း၊ ဖေ့စ်ဘွတ်ပေါ် ကြော်ငြာပြန်ထည့်ပြီး ငွေပြန်ရှာခြင်း လုပ်နေတဲ့ ဖေ့စ်ဘွတ်တီထွင်သူကြီးဟာ ၂၀၁၆ အမေရိကန်ရွေးကောက်ပွဲ ကမောက်ကမရလဒ် (ထရန့်နိုင်သွားခြင်း) ရဲ့ တရားခံတဦးအဖြစ် သမိုင်းတွင်သွားပါတော့တယ်။

ဆင်ခြေတခုကတော့ အင်တာနက်လွတ်လပ်ခွင့်အရ လူပြိန်းတိုင်း လူသာမန်တိုင်း ကိုယ်ထင်ရာမြင်ရာကို လွတ်လပ်စွာ အင်တာနက်ပေါ် တင်ဆက်နိုင်ပါတယ်။ အဲသည်အတွက် တားဆီးလို့ မရပါ။ သို့သော် လူပြိန်းတွေရဲ့ နောက်ခံရာဇ၀င်တွေကို အင်တာနက်ကုမ္မဏီတွေက စုဆောင်းပြီး ပြန်ရောင်း စီးပွားရှာတာကျပြန်တော့ ပိတ်ပင်လို့ မရပြန်ပါ။ သူတို့ဆားဗစ်သုံးလို့ ကိုယ့်အကြောင်း သူတို့လက်ထဲ ထည့်ပေးရပါတယ်။ ဒါကို အင်တာနက်လုပ်ငန်းရှင်တွေက ပြဌာန်းထားပြန်ပါတယ်။ လူပြိန်းတွေ တင်တာအချင်းချင်း မျှဝေကြ လက်ဆင်ကမ်းကြတာကိုလည်း တားဆီးလို့မရပြန်ပါ။ ဒါကလည်း လွတ်လပ်ခွင့်ထဲ ပါနေပြန်ပါတယ်။ အဲသည်မှာ ပြသနာက လူပြိန်းတွေရဲ့ စရိုက်နဲ့ အကြိုက်တွေကို နည်းပညာဆက်ဆံရေးကုမ္မဏီတွေ data miner တွေကို စုဆောင်း သုတေသနလုပ်ပြီး သူတို့တွေဆီကိုအရောက် ကြော်ငြာတွေ မဲဆွယ်တာတွေကို တင်ပို့ ဆွဲဆောင် စည်းရုံးမှု နည်းလမ်းတွေ ပရိယာယ်တွေ ဖန်တီးထုတ်လုပ်လာကြတာ ဖြစ်ပါတယ်။ ဒါတွေကို စီးပွားရေး နိုင်ငံရေး လူမှုရေး တသီးပုဂ္ဂလတွေထံ ငွေကြေးနဲ့ ရောင်းချကြတော့ ဒါတွေကို ၀ယ်တဲ့သူက လူပြိန်းကြိုက် လူစုံကြိုက် content အကြောင်းအရာတွေကို တမင်ပြုလုပ်ရောင်းချမှုတွေ လုပ်လာကြပါတော့တယ်။ လူပြိန်းအချင်းချင်း ကြိုက်လို့ ဝေမျှတဲ့အထဲမှာ အဲသည် တတိယအုပ်စုတွေက ဒီလူတွေစရိုက်အကြိုက်လိုက်တဲ့ တမင်ဖန်တီးထားတဲ့ အကြောင်းတွေ အိုင်ဒီယာတွေ ကြော်ငြာတွေ ဖြန့်ချိပြီး ၀ါဒဖြန့် လွှမ်းမိုးမှု ပြုလုပ်လာခြင်း ဖြစ်ပါတယ်။

သည်နည်းနဲ့ ဖေ့စ်ဘွတ်ပေါ်ကနေ ဆိုရှယ်မီဒီယာကနေ ပရိသတ်ကို ကိုယ်လိုရာ ဆွဲကြတော့တာကြောင့် အမေရိကန်ရွေးကောက်ပွဲလည်း မေးခွန်းထုတ်ခံရပါတယ်။ လူတွေက တကယ် ကိုယ်ယုံတာနဲ့ မဲပေးခဲ့တာလား၊ ဆိုရှယ်မီဒီယာပြောတာကို ယုံပြီး မဲပေးခဲ့ကြတာလားလို့ မေးခွန်းထုတ်ခံရတာ ဖြစ်ပါတယ်။ မြန်မာပြည်မှာဆိုရင်လည်း မယ်မြန်မာတို့ အဆိုပြိုင်ပွဲတို့ အလှပြိုင်ပွဲတို့တွေမှာ လူပြိန်းတွေက ကိုယ်သန်ရာ ကိုယ်ပြောနေရင်းကနေ မဲဝင်ဆွယ် ကြော်ငြာထိုး ဆေးဆိုးတာတွေနောက် လိုက်ပြီး အုံလိုက် ကျင်းလိုက် ထကြွမှုတွေ ဖြစ်ခဲ့ဖူးပါတယ်။ ခုနောက်ပိုင်း ထင်ရှားတဲ့ ထကြွမှုတွေကို ထောက်ပြရရင် – ထမင်းဝအောင်စားထား ဆိုတာမျိုး၊ ပေါကားတွေ ရပ်ဆိုတာမျိုး၊ မျိုးချစ်တွေရဲ့ အမုန်းစကားတွေ၊ ကင်ဆာပျောက်တယ်၊ လာဘ်ရွှင်တယ် ဆိုတာမျိုးတွေ၊ အစိုးရ ပါတီ လွှတ်တော် တိုင်းရင်းသား တပ်မတော်ကြား အချစ်ပြိုင် အမုန်းပြိုင် သရော်မော်ကားတဲ့ စကားဖြန့်ချိ အချီအချ ဖြစ်တာမျုိးတွေကို သာဓက ပြလိုပါတယ်။

ဒါတွေဟာ တတိယအုပ်စုတွေရဲ့ ရည်ရွယ်ချက်ရှိရှိ လှော်ခြင်း ဆွယ်ခြင်း ဆေးထိုးခြင်း သွေးထိုးခြင်းလို့ တပိုင်းက ဘာလို့ ပြောရတာလဲ ဆိုတော့ ဖေ့စ်ဘွတ်မှာ ငွေအနည်းငယ်သုံးလိုက်ရုံနဲ့ မိမိ လှော်ချင်တာတွေကို ပရိသတ် ထောင်သောင်းချီ ဖြန့်နိုင်အောင် တကယ်လုပ်လို့ ရတာ မြင်နေရတာကြောင့် ဖြစ်ပါတယ်။ ပြီးတော့ မြန်မာပြည်ရဲ့ ဖေ့စ်ဘွတ်သုံး ပရိသတ်မှာ လူပြိန်းတွေအများစုဟာ အမှန်တကယ် သုံးစွဲသူတွေ စွဲလန်းသူတွေ ဖြစ်နေကြပြီး သူတို့ အသည်းထိအောင် လုပ်နိုင်ရင် အတော်ကို ပွဲပြတ်ကြောင်း မြန်မာပြည်က အကျိုးစီးပွားကြည့်အုပ်စုတွေက သဘောပေါက်နေတာ အတော်တောင်ကြာနေပြီ ဖြစ်လို့ပါ။ သူတို့တွေ ဖန်တီး မြုတ်နှံထားတဲ့ တကိုယ်ရည်အကောင့်တွေ ဖေ့စ်ဘွတ်ပေ့တွေ အတော်များများ ရှိနေပြီး အတော်လေးကို လူပြိန်းတွေက စွဲလန်း နှစ်သက်နေကြတာကလည်း အထင်အရှား ဖြစ်လို့နေပါတယ်။

သည်တော့ အဲသည်လို ကိုယ်လိုရာစွဲ အသုံးချသူတွေကို ရှာဖွေ ဖော်ထုတ် ရှုတ်ချ တိုက်ခိုက်ကြရတော့မှာလား၊ ဖေ့စ်ဘွတ်ကိုပဲ ဖြတ်တောက်ရတော့မှာလား၊ ငြိမ်းစုစီလိုမျိုး ‘ဖေ့စုစီ’ ဆိုတဲ့ ဖေ့စ်ဘွတ်တားဆီးရေး ဥပဒေ လွှတ်တော်မှာတင်ပြီး မဲခွဲရတော့မှာလား။ အဲသည်လိုမျိုးတော့ မတိုက်တွန်းလိုပါဘူး။ ကျနော်တို့ မြှင့်တင်လိုတာက မြန်မာပြည်က လူပြိန်းပရိသတ်ကြီးရဲ့ တိမ်လှတဲ့ ဥာဏ်ရည်ကို ၀ိုင်းဝန်း မြှင့်တင်ကြဖို့နဲ့ ဆင်ခြင်တတ်တဲ့ ပရိသတ်တွေကို ရှေ့ရောက်လာဖို့ အားပေး အားမြှောက် ပြုကြစေချင်တာ ဖြစ်ပါတယ်။

အင်တာနက်အမှောင်ခေတ်အောက်မှာ မြန်မာပြည် ဒီမိုကရေစီရေး လှုပ်ရှားခဲ့ကြစဉ်တုန်းက သတိနဲ့ သတ္တိရှိတဲ့ တကယ့်ပရိသတ်ကြီးက ဒို့အရေးလှုပ်ရှားမှုတွေ သတင်းတွေ အသိဗဟုသုတတွေကို စွန့်စားပြီး ဖြန့်ဝေ အားပေးခဲ့ကြပုံကို ပြန်မြင်ယောင်ကြည့်ကြပါ။ အီးမေးတွေ ဘလောက်တွေ ပရင့်အောက်တွေနဲ့ လက်ဆင့်ကမ်းပြီး လှုပ်ရှားခဲ့ကြလို့ ဒီမိုကရေစီတိုက်ပွဲ ရေရှည်ခံ အားခဲပြီး ဆက်ချီတက်နိုင်ခဲ့ကြတာ ဖြစ်ပါတယ်။ အင်တာနက်အလင်းအောက်ရောက်လို့ မြန်မာပြည် ‘ဖေ့စ်ဘွတ်ဒီမိုကရေစီခေတ်’ လည်း ရောက်ရော တကယ့်ပရိသတ်၊ ဆင်ခြင်တဲ့ပရိသတ်ဟာ နောက်တန်းကို ရောက်လို့ လူပြိန်းပရိသတ်ကြီးဟာ ရှေ့တန်းမှာ ရဲရဲတောက် အရောင်စုံ အားကောင်းမောင်းသန် ဖြစ်လာခဲ့ရပါတယ်။ ဆင်ခြင်တဲ့ ပရိသတ်ကြီးကလည်း အရင်တုန်းကလို အမုန်းခံ ထောင်အကျခံ အဆဲခံ အဆိုခံ ရင်ဘောင်မတန်းတော့ပဲ အသာလေး နောက်လျိုနေလိုက်ကြတာကြောင့် လူပြိန်းအား နဲ့ လူပြိန်းစကားတွေ တမိုးလုံး ဖျောက်ဆိပ် ဖြစ်နေကြတယ်လို့ ဆိုချင်ပါတယ်။

လေ့လာသုံးသပ်သူတွေက နည်းပညာတွေ ၊အသုံးချကိရိယာတွေ၊ နောက်ကွယ်က လက်မည်းတွေကို ဝေဖန်ဆန်းစစ် ထောက်ပြ ဝေဖန်နေချိန်မှာ ကျနော်တို့ ကိုယ့်ပေါင်ကိုယ်လှန်ထောင်းသင့်တာက၊ လက်ညိုးထိုး ဆင်ခြင်သင့်တာတခုကတော့ မဟုတ်တဲ့သူတွေက မြှောက်ပင့်ပေးနေလို့ အတင်းအားတက် အုံကြွနေတဲ့ လူပြိန်းပရိသတ်ဖြစ်ပါတယ်။ ပရိသတ်အတွင်းမှာ အချင်းချင်း ဟန့်နိုင် ဖြောင့်ဖြနိုင်တဲ့ ဆင်ခြင်တဲ့ပရိသတ်ကိုလည်း ပြန်လည် မြေတောင်မြှောက် အားပေးဖို့ လိုအပ်နေပါတယ်။ ပေါကားတွေချည်း ပြလို့ ပေါကားပဲ ကြိုက်မိတဲ့ လူပြိန်းပရိသတ်ကို ဆင်ခြင်ပရိသတ်ကပဲ ရှားကားလေးတွေ ကြည့်ဖို့ တွန်းတွန်းတိုက်တိုက် ပြောဆို နားချပေးရပါမယ်။ ရေငုံနေကြလို့ မဖြစ်ပေဘူး။

သာဓက တခုကတော့ ၂၀၁၅ ရွေးကောက်ပွဲကာလတုန်းက မဲဆန္ဒရှင်တွေမှာ သံသယပင်လယ်ဝေနေတုန်း စင်ကာပူ၊ ဂျပန်စတဲ့ တိုင်းပြည်တွေက မြန်မာမဲဆန္ဒရှင်တွေ အဝေးရောက်မဲတွေ သတ္တိပြောင်ပြောင်နဲ့ ကြိုးစား ရုန်းကန်ပြီး ပေးကြ၊ သံရုံးတွေကို မေးခွန်းထုတ်ကြ၊ တရားမျှတမှုကို တောင်းဆိုခဲ့ကြတာကို မြန်မာပြည်တွင်း မဲဆန္ဒရှင်တွေကြားထဲ အသည်းပေါက်ခဲ့ကြတဲ့နောက် ၂၀၁၅ ရွေးကောက်ပွဲကြီးမှာ ပြည်သူတွေ သတိတချက် မလစ်ဟင်း မပေါ့ဆခဲ့ကြ သတ္တိတွေ ပြခဲ့ကြလို့ အင်န်အယ်ဒီ အောင်ပွဲရခဲ့တယ်လို့ ဆိုနိုင်ပါတယ်။ အမေစုချည်း စွမ်းခဲ့တာ မဟုတ်ပါ။ မဲဆန္ဒရှင်တွေရဲ့ မပေါ့ဆတဲ့ ဆင်ခြင်မှု ရပ်တည်မှုလည်း အရေးပါခဲ့ပါတယ်။ မဲပေးရုံပေးပြီး အိမ်ပြန်အိပ်ကြတဲ့ ပရိသတ်မဟုတ်ခဲ့ပါ။ မဲရုံပိတ် မဲရေတွက်ချိန် မဲရလဒ်ကြေငြာချိန်တွေအထိ မိုးလင်းမိုးချုပ် ပရိသတ်ကြီးက ထိုင်စောင့်ပြီး ဖေ့စ်ဘွတ်ပေါ်ကနေ သတင်းမှန်တွေ ပေး၊ ဖြန့်၊ ကောလဟာလတွေကို ဖိနှ်ိပ် တားဆီး လုပ်ခဲ့ကြတဲ့ ပရိသတ်ကြီးဆိုတာ ပြန်ပြောင်းသတိရစေလိုပါတယ်။ အဲသည်ပရိသတ်ကြီးက ရွေးကောက်ပွဲနိုင်ရုံနဲ့ အိမ်မပြန်ခဲ့ကြပါဘူး။ လွှတ်တော် အစိုးရ အောင်မြင်စွာ ဖွဲ့နိုင်သည်အထိ စိတ်ရှည် ဇွဲသန် သည်းညည်းခံပြီး လက်တွဲ ၀န်းယံ စောင့်ဆိုင်းပြီးမှ အောင်ပွဲခံခဲ့ကြတာလည်း မမေ့ကြစေချင်ပါ။

သည်တော့ ဖေ့စ်ဘွတ်ကြီးကို ပြစ်တင်၊ သမ္မတကြီးကို ပြစ်တင်၊ ရုရှားကို ပြစ်တင် (အမေရိကားကို ပြောတာပါ) ဒါနဲ့တင် ပြသနာက မပြေလည်ပါ။ ဖေ့စ်ဘွတ်ပေါ်က အမြင်တိမ်တဲ့ လူပြိန်းပရိသတ်ကြီးတွေကို အဆင့်မြှင့်တင်ပေးဖို့လည်း လိုအပ်နေကြောင်းပါ။ သူများတွေ လိုရာဆွဲ အသုံးချခံနေရတဲ့ လူပြိန်းပရိသတ်ကြီးကို ဆင်ခြင်တဲ့ပရိသတ် အစဉ်အလာသမိုင်းကို သိတဲ့ ပရိသတ်ကြီးကလည်း ရှေ့ထွက်ပြီး ပြန်လည် စည်းရုံး နားချ ဆွဲဆောင်ပေးကြဖို့ လိုအပ်နေကြောင်းပါ။ လူပြိန်းတွေ တမိုးလုံး ဖြောက်ဆိပ်ဖြစ်နေတာကို နောက်ဆုတ်ပြီး ကျောခိုင်းနေမယ့်အစား ဆင်ခြင်သော သိတတ်သော ပရိသတ်ကြီးကလည်း ရှေ့ထွက်ပြီး မိမ်ိသဘောထားတွေ အမြင်တွေ ဝေဖန်ဆင်ခြင်မှုတွေ ထုတ်ဖော် ပြောဆိုခြင်း မျှဝေခြင်း အသိပညာပေးခြင်းတွေ တွင်တွင်ကြီး ပြန်လုပ်ဆောင်ကြဖို့ တိုက်တွန်းလိုက်ပါတယ် ခင်ဗျား။ အင်တာနက်အမှောင်ခေတ်တုန်းကတောင် အလင်းရောင်ဆောင်ခဲ့ကြတဲ့ ဆင်ခြင်တဲ့ပရိသတ်ကြီးများ ခင်ဗျား … အင်တာနက်အလင်းအောက်မှာ မျက်စိတွေ မမှောက်မှားကြစေဖို့ သင်တို့ကို အလိုရှိပါကြောင်း အကျိုးမျှော်၍ နိုးဆော်အပ်ပါတယ်။

Comments